۱۳۹۱ اسفند ۲۶, شنبه

بی تواریءِ درد هدامرزی ملاکمالان هوتءِ بیران بیگءِ روچ



اسفندءِ دومی روچ هدامرزی ملاکمالان هوتءِ بیران بیگءِ روچ اِنت که سئے سال انت په بی تواری گوز ایتءُ روت. طوطی الحانءُ زهیر نالین کمالانءَ پنجاه سال گیش بلوچ قومءِ کوهنین شاعریءُ سازءُ زیمل چو وتی ساهءُ جانءَ پهریز اِت راستے اگاں که قومءَ آئیءَ هم عزتءُ شرف داتءُ کمالانءُ هر ازمگرءِ مسترین داد ...


ندای زاهدان - عبدالوهاب ایران نژاد - اسفندءِ دومی روچ هدامرزی ملاکمالان هوتءِ بیران بیگءِ روچ اِنت که سئے سال انت په بی تواری گوز ایتءُ روت. طوطی الحانءُ زهیر نالین کمالانءَ پنجاه سال گیش بلوچ قومءِ کوهنین شاعریءُ سازءُ زیمل چو وتی ساهءُ جانءَ پهریز اِت راستے اگاں که قومءَ آئیءَ هم عزتءُ شرف داتءُ کمالانءُ هر ازمگرءِ مسترین داد همیش اَت که مان وتی زندءَ چه وتی قومءُ دوزواهاں عزتءُ احترام به گند ایت ملاکمالان دانکه زندگ اَت قومءُ وتی گوشداروکانی دستانی دلءَ اَتءُ هدامرزیءِ مرکءَ قومءَ شرین رکستے وتی ازمگرءَ کت بلے باید نه اَت که اے مزنین نامءُ برزین بالاد چو زیت شموشگ به بیتینءُ رند چه سے/3 سال انگت آئیءِ یاتءُ ترانگءِ زندگ کنگءَ یک کسانین دیوانے گرگ مه بیتین.ندای زاهدان - عبدالوهاب ایران نژاد -


اے باز اپسوزی ءُ بژنی گپے ما ملاکمالان رنگین ازمگرے چوزیت به شموشین مروچی زندگیں قوم وتی ازمگرانی یاتءُ ازم زندگ دارگءَ چے چے که نه کن انت هر سال آیانی مرکءِ سالروچ په شانءُ شرف دارگ بیتءُ آیانی نام مزنین دیوانءَ همایش گرگ بیت که هم آیانی نامءُ یات زندگ به بیتءُ هم نوکین پدریچ آیانی ازمءُ فنءَ هیل به کن انت هدامرزی ملاکمالان په مئے راج کلاسیک شاعریءُ سازءُ زیملءَ سرجمینءُ پر گنجین کتابے که آئیءِ وانگءُ در برگ هر بلوچءِ اگده اِنت کمالانءِ یاتءُ ترانگ قومءِ وتی بودءُ کمالءَ پیش دارایتءُ بلوچ قومءِ وتی شرفءُ عزت اِنت اے ردءَ ما درست میاریگینءُ خاص ادبیءُ ازمی جهدکار گیشتر میار بار اِنت بلکے لهتے دوستءُ سنگتانی چم په دگران سک به بیت بلے ما اے چیزءَ په جوانی زانین که آیانی داد هما سرتگین باجیگءِ بتل اِنت گڑا مئے قومءِ وتی بامردین بچءُ جنکاں المءَ کد وتی ازمگرءُ زانتکارانی عزتءُ حرمت دیگءَ بنتءُ نباید اِنت په اے کسانین کاران دگرانی سرآروکءُ نژوارانی وداریگ به بنت. (شد نه روت چه میرءِ چانیگءَ / بیا گداییءِ کاسگءَ پروشین / مراد ساحر) البت کمالانی یاتءُ ترانگ بلوچ قومءِ هر دوزواهے دلءَ زندگ اِنت آئیءِ زهیریگ ، الهانءُ هالو ابدمان اَنت بلے اے جهانءِ دود اِنت که وتی هیرواهءُ زانتکاریں مزنین شخصیتانی قدرءُ قیمتءَ زان اَنت اے مئے اگدهءُ قدرشناسی اِنت که وتی زندگءُ مرتگین ازمگرءُ ادیبءُ شاعرانی هیالءَ بدارینءُ آیانی یاتءُ زندءَ چه زمانگءِ دنزءُ مجءُ تاموراں پهک به کنین اگاں خدا مه کنت ما وتی مزنین سرءُ نمیرانین شخصیتان به شموشین گڑا المءَ ما دگه کم چشین شخصیت پیداگ کت کنین سید هاشمی ، مولوی عبدالله ، هدامرزی کمالان ، ملا غلامقادر ، غلامرسول دینارزهی ، اشرف سربازی ، گل محمد صالحزهی ، خدارحم شکل زهی ءُ .... په هلو هالو مٹءُ بدل اِش پیداگ نه بیت اے اگاں زندگ اَنت یا چه کوڑویں امروز اِش لڈ اِتگ مئے قومءِ هستیءُ مڈیءُ میراث اِنت آیانی قدرءُ احترام مئی قومءِ سرجمین شریانی قدر کنگ اِنت.

زیگین روچ من یک دوستے جست کت که فلانی کمالانءِ بیرانیءِ سالروچ کدیگ اِنت؟ مردءَ در رائینت که اسفندءِ دومی روچ اِنت منءُ آئی هر دو پشلءُ چم اِں ارسیگ بوت انت که سے/3 سال په بے تواری گوستءُ ما انگت وتی مزنین شخصیتے سالروچءَ نه زانین بارین کمالان دگه قومے ازمگرءُ نمیرانین شخصیتے بوتین هنچو که ما آئیءِ قدرءُ قیمت اِش زانت؟!؟!؟

بازینے بلوچ قومءَ مردگ پرستیءِ شگانءَ جنت بلے منی هیالءَ مئے قوم وتی شتگین سران زیتر شموش ایتءُ بے ترانگ کنت اگاں نه ما په هدامرزی مولوی عبدالله ، استاد غلامرسول ، ملا کمالان رند چه مرکءَ چے کرتگ که مردگ پرستیءِ شگان مارا جنگ به بیت.